Ауыл – елдің алтын діңгегі. Осы ұстанымды берік ұстанған аудан басшылығы шалғай ауылдардың мәселелерін назардан тыс қалдырмай, өз кезеңімен шешуге күш салып келеді. Осыған орай, бүгін аудан әкімі Жандос Еркінбектің қатысуымен Алдашбай ахун және Дауылкөл ауылдық округтерінде тұрғындар алдында әкімдердің есепті кездесулері өтті.
Алдашбай ахун ауылдық округінде 2025 жылдың алғашқы жартысында округтің дамуында бірқатар ілгерілеу байқалды. Бюджет көлемі 93 млн теңгеден асса, оның барлығы толықтай игерілген. Салық түсімдері де 100 пайыз орындалды.
Өзекті мәселелердің бірі- Ынтымақ көшесіне – 17,6 млн теңге, Түпбөгет көшесіне – 25,1 млн теңге көшелеріне жарықтандару жұмыстары жүргізілді. Қазіргі таңда ауылдық округтегі көшелерді жарықтандыру жұмыстары толығымен аяқталып, ауыл 100 пайыз жарықпен қамтылған.
Тұрғындар үшін ең маңыздысы – инфрақұрылым. Бұл бағытта атқарылған жұмыстар ауқымды. Атап айтқанда, О.Шораяқұлы көшесіне жаяу жүргіншілер жолы салынды. Сондай-ақ Ә.Егізбаев көшесіне жөндеу жұмыстарын жүргізуге аудандық бюджеттен 100 млн теңге қаржы бөлініп, қазіргі таңда мемлекеттік сатып алу рәсімдері жүргізілуде.
Ауыл ішіндегі ескі электр бағаналарын да толықтай жаңартуға 184 млн теңге бөлініп, тиісті шаралар қолға алынды.
Источник : https://www.gov.kz/memleket/entities/kyzylorda-karmakshy/press/news/details/1040850?lang=kk
Добавить комментарий